यीशु हर प्रचार करे बर अउ कई अलग-अलग नगर मन मे लोग मन ला सिखाए बर अपन चेला मन ला भेजिस । फिर चेला मन फिर के जे कुछू भी ओमन मन करे रहिन, ओला यीशु लाहन बताए देहिन | यीशु हर डोंगा मे चईढ़ के हुवा ले कोनो सुनसान जगहा मे, एकान्त मे जाए बर ओमन ला निमंत्रण देहिस | तले ओमन एक डोंगा मे बईठ के अउ झील कर दूसर कती चईल देहिन | बहुतेच लोग मन हर यीशु अउ ओकर चेला मन ला डोंगा मे देखिन अउ सबेच नगर मन ले इखट्ठे होए के हुवा पैदल भागे अउ ओमन ले आगू जाए पहुचिन | जब यीशु अउ ओकर चेला मन हुवा पहुचिन त लोग मन कर एक बड़खा झुन्ड आगूच ले ही ओमन कर हुवा इंतजार करत रहिन | अउ भीड़ मे पाच हजार लोग मन रहिन, जेमन मे महिला अउ लईका मन कर गिनती नी रहिस | यीशु हर लोग मन कर बड़खा भीड़ ला देखिस अउ ओमन पर तरस खईस | काबर की ओमन मन ओ भेड़मन कर नियर रहिन जेमन कर कोई भी रखवाला नी है | अउ यीशु हर ओमन मन ला ढेरेच गोएठ मन ला सिखाए लगिस, अउ जे लोग मन चंगा होए बर चाहत रहिन ओमन मन ला चंगा करिस | जब दिन बहुतेच ढईल गिस, त यीशु कर चेला मन ओकर लिघे आए के कहे लागिन, “हिया देरी होए गिस है अउ कोनो भी नगर कर लिघे मे भी नी है | ओमन मन ला विदा कर कि ओमन मन अपन-अपन बर कुछू खाए बर खरिद लाने |” लेकिन यीशु हर चेला मन ले कहिस, “तुमन ही ओमन ला खाए बर दा |” चेला मन यीशु ले कहिन का हमन एसा कईर सकत हन”? हमर जग केवल पाच रोटी अउ दूई ठन मछरी है |” तब यीशु हर अपन चेला मन ले कहिस कि सब लोग मन ला हरीयर घास मे पचास-पचास कर समूह मे बैएठाए दा | यीशु हर ओ पाच रोटी अउ दूई ठन मछरी मन ला ले लेहिस, अउ स्वर्ग कती ला देख के, अउ खाना बर परमेश्वर कर धन्यवाद करिस | यीशु हर रोटी अउ मछरी मन ला तोएड़-तोएड़ के चेला मन ला देहिस की चेला मन लोग मन ला परोसे | चेला मन हर रोटी अउ मछरी मन ला सबेच झन मे बाएट देहिन, अउ रोटी अउ मछरी कम नी पड़ीन | अउ सब झन खाए के अघाए गिन | अउ जे खाना मन ला नी खाए रहिन | ओमे ले चेला मन हर टुड़का ले बारह पथिया भईर के उठईन, अउ कुछ मछरी मन ले भी | सबेच खाना केवल पाच रोटी अउ दूई मछरी ले बाचे रहिस |
एहर बाइबिल कर कहानी ले लेहल गईस है: मती 14 : 13-21 , मरकुस 6 : 31-41 , लूका 9 : 10-17 , यूहन्ना 6 : 5-15
