सैनिक मन कर यीशु ला क्रूस पर चड़हाए जाए कर बाद अविश्वासी यहूदी नेता मन हर पिलातुस के पास आए के कहिस | “ओ भरमाए बाला यीशु हर जब जीवित रहिस तब कहे रहिस, “की मैहर तीन दिन कर बाद जी उठहू |” कोनो ला ओकर कबर कर रखवाली करेक बर चाही ताकि ओकर चेला मन आए के ओकर देह ला चुराए झिन ले जाए अउ ओकर बाद कह देही कि ओहर मुरदा मन मे ले जी उठीस है |” पिलातुस हर कहिस, “कुछ सैनिक मन ला ले लेवा अउ जावा अपन समझ कर अनुसार रखवाली करा |” तले ओमन मन, कबर कर दूरा पर मोहर लगाए के अउ सैनिक मन कर पहरा लगाल गईस, जेकर ले कोनो हर देह ला चोराए झिन सके | यीशु ला दफ़नाए कर दिन कर बाद सब्त कर दिन रहीस, यहूदी याजक मन हर यीशु कर कबर पर जाए कर अनुमति कोनो ला भी नी देहिस | सब्त के दिन कर बाद कर दिन सुबह कई महिला मन यीशु कर देह पर सुगन्दित द्रव्य डाले बर ओकर कबर पर जाए बर तियार होइन | तब एक अचानक बड़खा भूकम्प होईस | काबर की प्रभु कर एक दूत हर स्वर्ग ले उतरिस, ओकर रूप बिजली कसन अउ ओकर कपरा पाला कर समान उज्जर रहिस | ओहर कबर कर पखना ला जेहर कबर कर दूरा पर लगाल रहिस हटाए देहिस अउ ओकर ऊपर बईठ गिस, कबर कर रखवाली करे बाला पहरुवा मन काएप उठिन अउ मरल मन कर नियर होए गिन | जब महिला मन कबर पर पहुचीन, तब स्वर्गदूत हर महिला मन ले कहिस, “मत डरा | यीशु हर यहा नी है, लेकिन अपन बचन कर अनुसार जी उठीस है |” आवा, ये जगहा ला देखा |” तब महिला मन हर कबर मे अउ जिहा यीशु कर देह रखल गए रहिस देखिन, त यीशु कर देह हर हुवा नी रहिस | तब स्वर्गदूत हर ओ महिला मन ले कहिस, “जावा अउ तुरतेच जाए के ओकर चेला मन ले कहिन, कि यीशु हर मरल मन ले जी उठिस है, अउ ओहर तुमन ले आगू गलील मे जाही |” अउ ओ महिला मन भी डर अउ ढेरेच ख़ुशी ले भईर गिन | अउ ओमन चेला मन ला ये ख़ुशी कर समाचार देहे बर कुदिन | जब ओ महिला मन चेला मन ला आनन्द कर सुसमाचार सुनाए बर जात रहिन, त डगर मे ओमन ला यीशु हर दिखाई देहिस, अउ ओमन मन ओकर आराधना करिन | तब यीशु हर ओमन ले कहिस, “मत डरा | मोर चेला मन ला जाए के कहा कि गलील कती चईल जावा, हुवा तुमन मोला देखिहा |”
बाइबिल ले ये कहानी ला लेहल गईस है : मती 27 : 62-28 : 15 ; मरकुस 16 : 1-11 ;लूका 24 : 1-12 ; यहून्ना 20 : 1-18
